സില്‍മാക്കഥ

വയസ്സായവര്‍ ഭാരമാകുന്നതും അവരെ ഓള്‍ഡ് ഏയ്ജ് ഹോമുകള്‍ക്ക് എറിഞ്ഞ് കൊടുക്കുന്നതും 'തിങ്കളാഴ്ച നല്ല ദിവസം' മുതല്‍ക്കാണെന്ന് തോന്നുന്നു പ്രചുര പ്രചാരത്തിലാണ്. നമ്മുടെ പുതിയ കഥയില്‍ 'ദയാവധ'മാവട്ടെ വിഷയം. 'താളവട്ട'ത്തിലേതോ 'സദയ'ത്തിലേതോ പോലെയല്ല, ശല്യമൊഴിവാക്കാനാണ്, 'അയാള്‍' മുത്തച്ഛനെയോ മുത്തശ്ശിയെയോ ദയാവധം ചെയ്യുന്നത്. ഈ കഥയില്‍ 2 പ്രശ്‌നങ്ങളുണ്ട്.

1. നായകന്‍ (മലയാള സിനിമയിലാണെങ്കില്‍) വില്ലനല്ലാത്ത വയസ്സ് ചെന്ന ഒരാളെ കൊല്ലുന്നത് മഹാപാപം.
വഴിയുണ്ട്. നായകന്‍ മറ്റൊരാളെ ആ പുണ്യദൌത്യം ഏല്‍പ്പിക്കട്ടെ.
ദെന്താ? ഈ വെള്ളരിക്കാ പട്ടണത്തില്‍ പൊലീസും നിയമോം ഒന്നുമില്ലേ?
അവിടെയാണ്, റിലീജ്യസ് കള്‍ട്ടുകള്‍ നമ്മടെ രക്ഷക്കെത്തുന്നത്. ക്വട്ടേഷന്‍ മേയ്ക്കമോതിരം പോലെ പഴയ ഫാഷനായി.
മുത്തപ്പനെ - പ്രിഫറബ്ളി മുത്തപ്പി, അല്‍പം കണ്ണീര്‍ വീണാല്‍ നഷ്ടമൊന്നുമില്ല - അപ്പോ മുത്തപ്പിയെ ഒരു കള്‍ട്ട്-സംഘത്തെ ഏല്‍പ്പിക്കുക. അവര്‍ ഒരു പുണ്യകര്‍മ്മത്തിനിടെ ആ കര്‍മ്മം ചെയ്താല്‍ ചോദ്യമില്ല.

2.അപ്പോള്‍പ്പിന്നെ അടുത്ത പ്രശ്‌നം. നമ്മുടെ നായകനെന്താ പണി? വേറെ വല്ലോരും ചെയ്യുന്ന കര്‍മ്മത്തിനിടെ അദ്ദേഹത്തിന്‍റെ പ്രാധാന്യം വയോജനങ്ങളുടേത് പോലെ മങ്ങി നരക്കില്ലേ?
ഈ മലയാള സിനിമക്ക് തിരക്കഥ ചമക്കുന്നത് വല്യ പണിയാണേ!